පාස්කු ප්රහාරය පිළිබඳ තොරතුරු ලැබී තිබියදී හෝටල් සහ පල්ලි වසා දැමීමට පියවර ගත්තේ නම් රටේ විශාල කලබලයක් ඇති වීමට ඉඩ තිබූ බව හිටපු පාර්ලිමේන්තු මන්ත්රී සුජීව සේනසිංහ මහතා පවසනවා.
රූපවාහිනී නාලිකාවක ඊයේ (25) පැවැති දේශපාලන වැඩසටහනකදී, පාස්කු ප්රහාරය වළක්වා ගැනීමට එවකට පැවැති යහපාලන ආණ්ඩුව අපොහොසත් වීම සම්බන්ධයෙන් මාධ්යවේදීන් නැඟූ ප්රශ්නවලට පිළිතුරු දෙමින් ඔහු මේ බව සඳහන් කළා.
පාස්කු ප්රහාරය ලෝකයේ වෙනත් රටවල සිදුවූ ත්රස්ත ප්රහාර හා සමාන කරමින් සුජීව සේනසිංහ මහතා අදහස් දැක්වූ අතර, ඔහු මිනිස් ජීවිත විනාශ වූ ප්රහාරයක් ඉතා සාමාන්ය සිදුවීමක් ලෙස අර්ථකථනය කිරීමට උත්සාහ කරන බවට එහිදී මාධ්යවේදීන් චෝදනා කළා.
ඊට පිළිතුරු දෙමින් ඔහු කියා සිටියේ ලෝකයේ ඕනෑම බලවත් රටක මෙවැනි අන්තවාදී ප්රහාර එල්ල වී ඇති බවත්, ඇමෙරිකාවේ ප්රහාරය පවා FBI ආයතනයට වළක්වා ගැනීමට නොහැකි වූ බවයි.
ප්රහාරය සම්බන්ධයෙන් පූර්ව පණිවිඩ ලැබී තිබුණද, එය එල්ල වන නිශ්චිත ස්ථානය පිළිබඳව නිසි අවබෝධයක් බුද්ධි අංශ සතු නොවූ බව සුජීව සේනසිංහ මහතා පැවසුවා.
“දවසකට කලින් පණිවිඩය ආවත්, ප්රහාරය කොහේදී සිදුවේදැයි සොයා ගැනීමට නොහැකි වුණා. සාමාන්ය වාතාවරණයක් තිබියදී හෝටල් වසා දමා, පල්ලිවලට යන්න එපා කියා නැවැත්තුවා නම් විශාල කලබලයක් ඇති වෙනවා. එවැනි අවස්ථාවක තීන්දු ගැනීම ඉතාමත් අපහසුයි”
එවකට හිටපු ජනාධිපති මෛත්රීපාල සිරිසේන මහතාට මීට වඩා සැලකිලිමත් වීමට අවස්ථාව තිබූ බව පිළිගන්නා බව පැවසූ සුජීව සේනසිංහ මහතා කියා සිටියේ, ජනාධිපතිවරයා ලෙස මෛත්රීපාල සිරිසේන මහතා ඒ පිළිබඳ සොයා බැලිය යුතුව තිබූ බවයි.
එමෙන්ම විජයදාස රාජපක්ෂ මහතා පාර්ලිමේන්තුවේදී කළ අනතුරු ඇඟවීම් පිළිබඳව මාධ්යවේදීන් විමසූ විට , එවකට අධිකරණ ඇමතිවරයා ලෙස කැබිනට් මණ්ඩලයේ සිටි ඔහුටද ඒ පිළිබඳ ක්රියා කිරීමට අවස්ථාව තිබූ බව ඔහු සඳහන් කළා.
කෙසේවෙතත් වඳ කොත්තු, වෛද්ය සාෆි සිද්ධිය සහ බුදු පිළිමවලට හානි කිරීම වැනි සිදුවීම් හරහා ආණ්ඩුවට එරෙහිව ජනතා විරෝධයක් ගොඩනැඟුණු බව මාධ්යවේදීන් පෙන්වා දුන් අතර, සුජීව සේනසිංහ මහතා එය ප්රතික්ෂේප කළා.
එම ප්රශ්න කිරීම් හමුවේ තරමක් නොසන්සුන් වූ ඔහු ප්රකාශ කළේ තමන් පාස්කු ප්රහාරය පිළිබඳ පරීක්ෂණවලට සම්බන්ධ නැති බවත්, ඒ පිළිබඳව තවදුරටත් තමන් සමඟ වාද කිරීමෙන් පලක් නොවන බවයි.
පාස්කු ප්රහාරය හේතුවෙන් දේශපාලනිකව විශාල ඡන්ද පාඩුවක් සිදුවූ බවද සුජීව සේනසිංහ මහතා වැඩිදුරටත් සඳහන් කළා
