හිටපු ධීවර අමාත්ය රාජිත සේනාරත්න අත්අඩංගුවට ගැනීමට නියමිත බව අල්ලස් හෝ දූෂණ චෝදනා විමර්ශන කොමිසමේ නිලධාරීන් ඊයේ (27) කොළඹ ප්රධාන මහේස්ත්රාත් අධිකරණයට දැනුම් දී තිබෙනවා.
ඒ, අත්අඩංගුවට ගත් ධීවර වරාය නීතිගත සංස්ථාවේ හිටපු සභාපති උපාලි ලියනගේ අධිකරණයට ඉදිරිපත් කළ අවස්ථාවේදීයි.
කිරින්ද ධීවර වරායේ වැලි පිරිසිදුකර වෙළඳපොළට මුදා හැරීමේ ව්යාපෘතියක් කොරියානු සමාගමක් සමග එක්ව ක්රියාත්මක කිරීමේදී ධීවර වරාය නීතිගත සංස්ථාව සතු වැලිගොව්වා නෞකාව මෙන්ම අනෙකුත් පහසුකම් ද අදාළ කොරියානු සමාගම වෙත ලබාදීමට සිදුවීම තුළින් ධීවර වරාය නීතිගත සංස්ථාවට රුපියල් ලක්ෂ 262ක පාඩුවක් සිදුවීම සම්බන්ධයෙන් උපාලි ලියනගේ අල්ලස් කොමිසම විසින් අත් අඩංගුවට ගනු ලැබුවා.
ඔහුව අධිකරණයට ඉදිරිපත් කිරීමෙන් අනතුරුව රුපියල් මිලියන 5 බැගින් වූ ශරීර ඇප තුනක් මත මුදා හැරීමට කොළඹ ප්රධාන මහෙස්ත්රාත් තනුජා ලක්මාලී ජයතුංග නියම කළා.
එමෙන්ම සැකකරුගේ විදෙස් ගමන් තහනම් කිරීමටත් ඔහුගේ විදෙස් ගමන් බලපත්රය අධිකරණය භාරයට ගැනීමටත් මහේස්ත්රාත්වරිය විසින් නියෝග කර තිබෙනවා.
මේ අතර, ගුවන් යානා මිලදී ගැනීමක් සම්බන්ධ විමර්ශනයකට අත් අඩංගුවට ගැනුණු ශ්රී ලංකන් ගුවන් සමාගමේ හිටපු සභාපති නිශාන්ත වික්රමසිංහ මහතා ජූලි පළමු දින දක්වා රක්ෂිත බන්ධනාගාරගත කිරීමට නියෝග කර තිබෙනවා.
අල්ලස් චෝදනා මත අල්ලස් කොමිසම විසින් අත්අඩංගුවට ගත් සැකකරු ඊයේ (27) කොළඹ මහෙස්ත්රාත් අධිකරණයට ඉදිරිපත් කිරීමෙන් පසුවයි එම නියෝගය ලබා දී තිබුණා.
