ජනාධිපති අපේක්ෂකයින් ප්‍රවර්ධනය වන පරිදි ස්ටිකර් සහිතව ධාවනය වූ ත්‍රිරෝද රථ 10ක ස්ටිකර් ඉවත් කර තිබේ.
කොල්ලුපිටිය, බම්බලපිටිය ඇතුළු ප්‍රදේශ ආශ්‍රීතව ක්‍රියාත්මක කළ මෙහෙයුමකදී එම ත්‍රිරෝද රථ හදුනා ගත් බව පොලීසිය පැවසුවේ ය.
අපේක්ෂක ප්‍රවර්ධන ස්ටිකර් සහිත පෞද්ගලික බස් රථ, ත්‍රිරෝද රථ හා සෙසු පෞද්ගලික වාහන සොයා දිවයින පුරා විශේෂ මෙහෙයුම් ආරම්භ කර ඇතැයි පොලීසිය පවසයි.
හැකි සෑම අවස්ථාවකම හදිසි මාර්ග බාධක යොදා එවැනි වාහන හඳුනාගෙන ස්ටිකර් ඉවත් කිරීමට පියවර ගන්නැයි, දැනුම් දී ඇති බව පොලීසිය සඳහන් කළේ ය.
ජනාධිපති අපේක්ෂකයින් ප්‍රවර්ධන ස්ටිකර් වහා ඉවත් කරන්නැයි, මැතිවරණ කොමිසම දැනුම් දෙන්නේය.
ඒ, විශේෂ නිවේදනයක් නිකුත් කරමිනි.
එවැනි කටයුතු 1981 අංක 15 දරන ජනාධිපතිවරයා තෝරා පත්කරගැනීමේ පනතේ 74 වැනි වගන්තිය අනුව වරදක් බව කොමිසම පෙන්වා දෙයි
