ආණ්ඩුක්‍රම ව්‍යවස්ථාව සුළු පිරිසකගේ දේපලක් වීමට ඉඩ නොදී පාසල් මට්ටමේ සිට ඉගැන්විය යුතුයි – විපක්ෂ නායක සජිත් ප්‍රේමදාස

ප්‍රජාතන්ත්‍රවාදය, ආණ්ඩුක්‍රම ව්‍යවස්ථාව, විධායකය, ව්‍යවස්ථාදායකය, ප්‍රතිපත්ති සම්පාදනය ගැන තීන්දු තීරණ ගන්නා ආකාරය ගැන දුවා දරුවන් දැනුවත් විය යුතු බවත් ඒ සඳහා සෑම පාසලක ම පුස්තකාලයට ආණ්ඩුක්‍රම ව්‍යවස්ථාවේ පිටපතක් ලබා දිය යුතු බවත් එවිට කවුරුත් කියන දේ අහනවට වඩා ජනතාවට ම සත්‍ය දැනගත හැකි බවත් විපක්ෂ නායකවරයා පැවසීය.

එසේ ම පුරවැසි අධ්‍යාපනය තුළ දුදරුවන්ගේ අධ්‍යාපනය තුළ ආණ්ඩුක්‍රම ව්‍යවස්ථාව පාසලේ පුස්තකාලයට ලබා දීම සේම ඔවුන්ට අවබෝධය ලබා දිය යුතු බවත් සුළු පිරිසක් මෙය අර්ථකථනය කිරීමට ගියොත් අතිශය භයංකාර තත්ත්වයක් ඇති වන බවත් රටේ නීතිය ඔවුන්ට අවැසි ලෙස පරිහරණය කළ හැකි බවත් ආණ්ඩුක්‍රම ව්‍යවස්ථාව පවා පෞද්ගලික පරිහරණයට ලක්විය හැකි බවත් විපක්ෂ නායක සජිත් ප්‍රේමදාස මහතා පැවසීය.

*විපක්ෂ නායක සජිත් ප්‍රේමදාස මහතා මේ බව කියා සිටියේ කළුතර බණ්ඩාරගම මිල්ලනිය අගුරුවාතොට උඩුවර කණිෂ්ඨ විද්‍යාලයට සක්වල සුහුරු පන්ති කාමර ලබා දීමේ වැඩසටහනේ 380 වැනි අදියර යටතේ රුපියල් 1,177,000ක් සුහුරු පන්ති කාමර උපකරණ සහ ශබ්දකෝෂ රැසක් පරිත්‍යාග කිරීමේ අවස්ථාවට එක්වෙමිනි. මෙහි දී පාසල් සංවර්ධන ගිණුමට රු. ලක්ෂයක මුදලක් පරිත්‍යාග කළේය.*

අද වන විට විවිධ කණ්ඩායම් ව්‍යවස්ථා දායකය විධායකය ආදිය ගැන විවිධ කතා කියන බවත් එම නිසා පුරවැසියන්ට මේ ගැන නිසි දැනුමක් තිබිය යුතුු බවත් එසේ නොවුවහොත් රටේ තාවකාලික බාරකරුවන් වන පාලකයෝ ආණ්ඩුක්‍රම ව්‍යවස්ථාවේ ඇති කරුණු හා වගන්ති විවිධ ආකාරයට අර්ථ නිරූපණය කරන ඔවුන්ට අවැසි ලෙස අර්ථකථනය කරන බවත් විපක්ෂ නායකවරයා පැවසීය.

ආණ්ඩුක්‍රම ව්‍යවස්ථාව ගැන දැනුවත් නම් කාටවත් කවුරුන්වත් රැවටිය නොහැකි බවත් එවිට මූලික අයිතිවාසිකම් ගැන දැනුවත් විය හැකි බවත් සැබැ තත්ත්වය ජනතාවට දැන ගැනීමට හැකි බවත් විපක්ෂ නායකවරයා වැඩිදුරටත් පැවසීය.

තවද සමගි ජන බලවේගය නිර්මාණය කරන සංවර්ධන සැලසුම් තුළ ජනතාව අනාථ නොකරන බවත් අනිවාර්යයෙන් ම ජීවනෝපායට හරි මගක් නිර්මාණය කරණ බවත් විපක්ෂ නායකවරයා පැවසීය.

*සමගි ජන බලවේගය විසින් ක්‍රියාත්මක කරන හුස්ම වැඩසටහන යටතේ මේ වන විට රෝහල් 63කට රුපියල් ලක්ෂ 1906ක් වටිනා ඖෂධ සහ රෝහල් උපකරණත්, සක්වල බස් රථ වැඩසටහන යටතේ පාසල් 89ක් සඳහා රුපියල් ලක්ෂ 50ක් වටිනා බස් රථ 89ක් ලබා දී ඇති අතර ඒ සඳහා රුපියල් ලක්ෂ 4342ක් ද සක්වල තොරතුරු තාක්ෂණ වැඩසටහන යටතේ පාසල් 380ක් සඳහා සුහුරු පන්ති කාමර උපකරණ ලබා දී ඇති අතර ඒ සඳහා රුපියල් ලක්ෂ 4239ක් වැය කර තිබේ.*