ආණ්ඩුක්රම ව්යවස්ථාවේ 19 වන සංශෝධනය විධිමත් ආකාරයෙන් සම්මත වී නොමැති නිසා එය ජනමත විචාරණයකට යොමු කර ඉන් අනුමැතිය ලබා ගන්නා තුරු ජනාධිපතිවරණයක් පැවැත්වීම තුළින් ආණ්ඩුක්රම ව්යවස්ථාව උල්ලංඝණය වන බවට තීන්දුවක් ලබා දෙන ලෙස ඉල්ලා ගොනු කළ මූලික අයිතිවාසිකම් පෙත්සම විභාගයට නොගෙන රුපියල් ලක්ෂ 5ක නඩු ගාස්තුවකට යටත්ව නිෂ්ප්රභ කිරීමට ශ්රේෂ්ඨාධිකරණය අද (ජූලි 15) නියෝග කර තිබේ.
ඊට අදාළ නඩු ගාස්තුව ජූලි 31 වන දාට පෙර ගෙවිය යුතු බව එහිදී පෙත්සම්කරුට නියෝග කර තිබේ.
මෙම මූලික අයිතිවාසිකම් පෙත්සම අගවිනිසුරු ජයන්ත ජයසූරිය, අර්ජුන ඔබේසේකර සහ ප්රියන්ත ප්රනාන්දුගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ සලකා බලා ඇත.
ජූලි 11 වන දා මෙම පෙත්සම නීතිඥවරයෙකු වන අරුණ ලක්සිරි උණවටුන විසින් ඉදිරිපත් කරනු ලැබ තිබේ.
පෙත්සම්කරු සඳහන් කර ඇත්තේ, ආණ්ඩුක්රම ව්යවස්ථාවේ 19 වන සංශෝධනය තුළින් ආණ්ඩුක්රම ව්යවස්ථාවේ 70 වන ව්යවස්ථාව සංශෝධනය කර තේරී පත් වන පාර්ලිමේන්තුවක් වසරක් ගෙවී යාමෙන් පසුව විසුරුවා හැරීමට ජනාධිපතිවරයා සතු බලය අහිමි කිරීමට කටයුතු කර ඇති බව ය.
එම සංශෝධනය ජනමත විචාරණයකට යොමු කළ යුතු බව ත් ශ්රේෂ්ඨාධිකරණ විනිසුරු මඩුල්ලක් තීන්දු කර තිබුණත් එය ජනමත විචාරණයකින් මේ දක්වා අනුමත වී නොමැති බව ත් පෙත්සම්කරු සඳහන් කර තිබිණි.
එසේ තිබියදී 19 වන සංශෝධනය තවදුරට ත් නීතියක් වශයෙන් පිළිගෙන කටයුතු කිරීම වැරදිසහගත බව ඔහු පෙත්සම මගින් වැඩිදුරට ත් පෙන්වා දී තිබිණි.
මේ අතර, සී.ඩී. ලේනව නමැති ව්යාපාරිකයෙකු ද ජනාධිපතිවරණය කල් දාන්නයි ඉල්ලා මූලික අයිතිවාසිකම් පෙත්සමක් ගොනු කළ අතර එම පෙත්සම ද විභාගයට නොගෙන නිෂ්ප්රභ කිරීමට ශ්රේෂ්ඨාධිකරණය ජූලි 8 වන දා නියෝග කළේ ය.
